GzVideos

Novo éxito da folga xeral do sector do Metal, que colapsou todos os accesos á factoria de Citroen a mediodia, onde houbo cargas policiais.

Nova xornada de folga do Metal na provincia de Pontevedra, que continúa como unha folga consolidada e que segue a mobilizar a milleiros de traballadores e traballadoras nas rúas. Neste dia anunciouse a convocatoria de tres xornadas máis de folga para a próxima semana, mércores, xoves e venres, convocando no último dia desa semana a todo o sector do Metal, mesmo aquelas empresas que contan con convenio propio como Citroen. Tamén este mércores volveron actuar dun xeito desproporcionado e violento as forzas antidisturbios, que fixeron a súa aparición na Praza de América, a toda velocidade, e que desde aí comezaron cargas indiscriminadas, que rematarían fronte ao estaleiro de Barreras, onde de novo os folguistas resistiron ao lanzamento masivo de pelotas de goma e botes de fume. E o xoves terá lugar a segunda xornada da folga do Metal desta semana. Máis na web da CIG.

Traballadores do naval da cidade de Vigo secundaban media xornada de folga e saían ás rúas en manifestación como resposta á represión policial durante a cuarta xornada da folga no sector do metal. Logo de se reuniren en asemblea nos diferentes centros de traballo, mais de 5000 traballadores demostraban publicamente a unidade no sector e a repulsa á violencia policial e patronal, á que responsabilizan das cargas. Máis.

O 21 de maio tivo lugar a cuarta xornada de folga do metal, no que desta volta o obxectivo era cortar en oito puntos distintos os accesos de Vigo, mesmo bloqueando a peaxe de Pontevedra en Vilaboa. Unha nova demostración de forza e organización dos traballadores do Metal fixo realidade este obxectivo. A Policia acosou desde primeira hora aos folguistas, e despois das once da mañá cargaban en Guixar e tamén contra un grupo de Barreras na zona de Coia. Os traballadores reagrupáronse nas zonas dos estaleiros, en Barreras e Vulcano, e volveron dar unha boa mostra de organización, valentía e forza dun sector que está disposto a dar esta batalla por un convenio xusto. Máis info na páxina da CIG. Música do vídeo: Skacha, Xolda! e Labazada.

Tamén está dispoñíbel o vídeo da CIG desta xornada de loita

O 7 de maio arrincaba unha nova xornada de folga para o sector do Metal na provincia de Pontevedra. Desde primeira hora da mañá xuntáronse os piquetes nas distintas zonas, para as dez da mañá achegarse até o Recinto Feiral de Vigo, Ifevi, onde ocuparon o Salón de Automóbil, que estes dias está neste espazo, pechando as portas do recinto “porque hoxe o salón do Automóbil é para os traballadores do Metal e para ninguén máis”. Mentres en Pontevedra, o grupo de piquetes de Marín ocupaba a sede dos empresarios desta comarca, asi como se pechaban no Hotel no que se celebraban unhas Xornadas sobre a Lei Concursal.

A imaxe pertence ao paro do naval do pasado 13 de maio, no que se denunciaron as contratacións irregulares que afectan en maior medida ao colectivo de migrantes.