GzVideos

“GzVideos é umha ferramenta de e para os movimentos sociais e colectivos galegos”, “desde a humildade de quen comeza a caminhar, queremos que o direito à informaçom, à comunicaçom e à criaçom dum pensamento crítico seja umha realidade na Galiza. Que cada umha de nós poida dar a conhezer o que lhe interessa, reapropriándo-se da tecnologia para a ediçom criativa e a difussom da nossa obra audiovisual”. Assi diz o texto que redactamos em Maio de 2007 para a inauguraçom do web. O que nom previamos daquela era que , logo de umha magnífica etapa e de constituír-mos umha ferramenta plural e ao serviço das luitas silenciadas polos meios corporativos, seria a tecnologia a que se acabaria apropriando de nós.(segue…)

Máis →

No día 10 de Fevereiro de 2010, tanto o web GzVideos.info como o repositório de vídeos “gzvideos.blip.tv” forom atacados, tendo como consequência o borrado total dos materiais audiovisuais da conta , o deterioro e eliminaçom de grande parte dos conteúdos, assi como a provocaçom de falhas no funcionamento do web. Assi pois, o arquivo audiovisual desde 2007 foi completamente eliminado, assi como as URL que apontavam a buscadores, redes sociais e ligaçons externas. A falta de esclarecer a autoría e motivaçom dos factos, a causa mais provável que baralhamos é o usso fraudulento das contas de accesso. No entanto, afirmamos a vontade por repor os vídeos no menos tempo possível em base ao nosso arquivo e disponibilizar o accesso em quanto poidamos. GzVídeos tentará esclarecer os factos o antes possível. Continuaremos o trabalho contra-informativo iniciado em 2007 , por e para os movimentos sociais e colectivos da Galiza, pese a quem lhe pesar. Atençom a próximas actualizaçons. (segue…)

Máis →

Gzvideos participará o sábado 21 de novembro ás 19 da tarde no Mufest, festival de cine feito por mulleres, no Auditorio de Galiza en Compostela.

 Este festival está organizado pola Revista de Pensamento Feminista Andaina, leva por lema “Faite ver!”, e  ten como obxectivo fomentar a creación audiovisual das mulleres proporcionando un espazo para a exhibición e o debate.

 Unha compañeira de Gzvideos presentará unha nova peza que editamos para este festival, e que leva por título: “Mulleres, xénero, sexualidades e outros relatos subalternos”, e que subiremos á rede despois da súa estrea no Mufest este sábado.

 Convidámosvos a asistir a todas e todos a este festival ao longo das tres xornadas do mesmo, e á nosa pequena aportación ao mesmo.

 Porque nos tamén nos imos facer ver.. Achégate até o Mufest!

Por cousas alleas á nosa vontade (basicamente o jet lag ou transtorno horario polo desprazamento á meseta), traemos aqui unha pequena crónica da nosa viaxe a Madrid e a participación nas Xornadas Antifascistas de Madrid hai xa máis dunha semana, glups!

Unha pequena delegación de Gzvideos viaxou até Madrid para participar dun videoforum o sábado 31 de outubro, organizada pola Coordinadora Antifascista de Madrid e convidadas por La-Plataforma, proxecto de contrainformación audiovisual.

No videoforum, que formaba parte das Xornadas Antifascistas da Coordenadora Antifascista de Madrid, baixo o título “Criminalización dos movementos sociais. Contrainformación audiovisual”, proxectouse o documentario de La Plataforma “Alarma social, como se crea? (que podedes ver aquí). Nós desde Galiza levamos un resumo do noso traballo do último ano, unha escolma de vinte minutos, que tamén colgamos na web.

Diante dun auditorio moi variado, e nunha sala ben xeitosa do Centro Social La Traba, tivo lugar a proxección da nosa peza, e despois fixemos unha pequena introdución, na que dimos a coñecer o proxecto de Gzvideos, relatamos como saía á luz a web en maio de 2008 e o traballo previo que existía no videoactivismo no noso país e na actualidade.

Dalgún xeito dabamos a coñecer no centro do pequeno imperio o manifesto fundacional de Gzvideos e a nosa particular visión da contrainformación audiovisual, do fomento do uso de licenzas libres e da necesidade de visibilizar aquelas voces que desde Galiza cuestionan o poder dominante e fomentan a criación de pensamento crítico desde os máis diversos ámbitos.

Despois viría a presentación do traballo de La Plataforma e a proxección do seu documentario, e xa logo un interesante e variado debate no que a cuestión da criminalización e como rachar barreiras para a difusión do material que editamos os colectivos de contrainformación audiovisual, para que non sexan só pezas para autoconsumo das propias activistas que a protagonizan, foron outros dos temas tratados e a posta en común das distintas realidades que unhas e outras videoactivistas vivimos nos nosos respectivos territorios.

O mellor da viaxe foi, máis alá da boa acollida no videoforum, coñecer ás compañeiras de La Plataforma, que nos agasallaron con atención, intercambio de experiencias, ensinaronnos o Centro Social La Traba, foron as nosas guias en paseos por Malasaña e Lavapiés, e sobre todo deronnos ánimos e moitas ideas pola súa experiencia, con videocrónicas na rede desde comezos do 2006, e os seus traballos editados en dvd.

Obrigadísimas ás compañeiras de La-Plataforma e á próxima convidamos nós!

Nota extras: Xa informaremos de próximas convocatorias, mais adiantamos que o sábado 21 de novembro participaremos no Auditorio de Galiza en Compostela no Mufest (festival de cine feito por mulleres), organizado pola revista de pensamento feminista Andaina, no que proxectaremos unha peza realizada para esta data co título “Mulleres, xénero, sexualidades e outros relatos subalternos”.

Desde GzVideos queremos expresar a nosa satisfacción pola absolución dunha das nosas reporteiras, acusada en falso pola policía española por supostamente ter berrado consignas tais como “policía asasina” (sic) ou “eta mátalos” (sic) durante unha concentración en Compostela. Tales acusacións non só constituian un auténtico engano e unha rotunda falsidade, se non que pretendían servir de coartada para a represión da liberdade de expresión e información ao noso medio informativo.

A sentenza absolutoria considera probada a asistencia da nosa compañeira ao acto na súa condición de xornalista, algo que foi demostrado durante o xuízo con numerosas probas, como os propios materiais gráficos ou a acreditación profesional. Así mesmo, recolle que a absolución se produce debido á “non comparecencia do superior do axente que levou a cabo a identificación”, un circunloquio co que o xuíz Míguez Poza tentou agochar o atropelo e numerosas irregularidades cometidas polos axentes no seu intento por reprimir à reporteira, non dubidando en denunciala en falso co obxectivo de impedir o seu labor profesional.

Temos que recordar que, durante a comparecencia no xuízo do axente que naquela altura a identificara, o polícia incorreu en numerosas contradicións e negou que a nosa compañeira se tivera identificado como xornalista. De feito, comezou por afirmar que simplesmente acudira a identificar a persoa que berrara as supostas consignas, para logo rectificar, dicindo que en realidade a iniciativa partira dun superior, mais que ainda así podía sinalar à nosa compañeira como a causante, sen dúbidas. É de sinalar que , ademais, se negou a “entender el gallego”.

Máis →