O pasado 8 de Marzo, Día Internacional das Mulleres, a Marcha Mundial das Mulleres na Galiza mobilizouse en distintas cidades da nosa xeografía baixo o lema «As Mulleres Traballamos, As Mulleres Contamos: Non solucionaredes a crise a costa dos nosos dereitos». Neste vídeo recollemos a manifestación que percorreu as rúas de Vigo, e tamén unha acción da Asemblea de Mulleres de Vigo no Monumento ao Traballo. Fronte á representación simbólica exclusivamente en masculino que se fai do traballo nesta escultura, a Asemblea de Mulleres volvía recordar a mulleres galegas esquecidas e invisibilizadas pola historia, e das que nin existen estatuas, nin rúas. Por iso apostan polo traballo activo e nas rúas, por un feminismo independente, que traballe cada día para luitar por un presente distinto no que as mulleres re-escriban o seu pasado e deseñen xuntas un futuro ben distinto, sen discriminacións.